754. Her Cuþred forþferde, and Cyneheard onfeng biscepdome æfter Hunferþe on Wintanceastre; and Cantwara burg forbærn þy geare, and Sigebryht feng to Wesseaxna rice, and heold an gear.
755. Her Cynewulf benam Sigebryht his rices and Westseaxna wiotan for unryhtum dædum, buton Hamtunscire. And he hæfde þa oþ he ofslog þone aldormon þe him lengest wunode, and hiene þa Cynewulf on Andred adræfde. And he þær wunade oþ þæt hiene an swan ofstang æt Pryfetesflodan; and he wræc þone aldormon, Cumbran.
And se Cynewulf oft miclum gefeohtum feaht wiþ Bretwalum. And ymb xxxi wintra þæs þe he rice hæfde, he wolde adræfan anne æþeling se was Cyneheard haten, and se Cyneheard wæs þæs Sigebryhtes broþur.
And þa geascode he þone cyning lytle werode on wifcyþþe on Merantune, and hine þær berad, and þone bur utan beeode ær hine þa men onfunden þe mid þam kyninge wærun.
And þa ongeat se cyning þæt, and he on þa duru eode, and þa unheanlice hine werede, oþ he on þone æþeling locude, and þa utræsde on hine, and hine miclum gewundode. And hie alle on þone cyning wærun feohtende oþ þæt hie hine ofslægenne hæfdon.
And þa on þæs wifes gebærum onfundon þæs cyninges þegnas þa unstilnesse and þa þider urnon, swa hwelc swa þonne gearo wearþ and radost. And hiera se æþeling gehwelcum feoh and feorh gebead, and hiera nænig hit geþicgean nolde, ac hie simle feohtende wæran oþ hie alle lægon butan anum Bryttiscum gisle, and se swiþe gewundad wæs.
Ða on morgenne gehierdun þæt þæs cyninges þegnas þe him beæftan wærun þæt se cyning ofslægen wæs, þa ridon hie þider, and his aldormon Osric, and Wiferþ his þegn, and þa men þe he beæftan him læfde ær, and þone æþeling on þære byrig metton þær se cyning ofslægen læg, and þa gatu him to belocen hæfdon and þa þær to eodon.
And þa gebead he him hiera agenne dom feos and londes gif hie him þæs rices uþon, and him cyþdon þæt hiera mægas him mid wæron þa þe him from noldon. And þa cuædon hie þæt him nænig mæg leofra nære þonne hiera hlaford, and hie næfre his banan folgian noldon.
And þa budon hie hiera mægum þæt hie gesunde from eodon. And hie cuædon þæt þæt ilce hiera geferum geboden wære, þe ær mid þam cyninge wærun. Þa cuædon hie þæt hie hie þæs ne onmunden "þon ma þe eowre geferan þe mid þam cyninge ofslægene wærun."
And hie þa ymb þa gatu feohtende wæron oþþæt hie þær inne fulgon, and þone æþeling ofslogon, and þa men þe him mid wærun alle butan anum. Se wæs þæs aldormonnes godsunu, and he his feorh generede and þeah he wæs oft gewundad.
And se Cynewulf ricsode xxxi wintra, and his lic liþ æt Wintanceastre, and þæs æþelinges æt Ascanmynster, and hiera ryhtfæderencyn gæþ to Cerdice.
And þy ilcan geare mon ofslog Æþelbald Miercna cyning on Seccandune, and his lic liþ on Hreopadune ; and Beornræd feng to rice, and lytle hwile heold and ungefealice. And þy ilcan geare Offa feng to rice, and heold xxxviiii wintra, and his sunu Egfer heold xli daga and c daga.
Se Offa wæs Þincgferþing, Þincgferþ Eanwulfing, Eanwulf Osmoding, Osmod Eawing, Eawa Pybing, Pybba Creoding, Creoda Cynewalding, Cynewald Cnebing, Cnebba Iceling, Icel Eomæring, Eomær Angelþowing, Angelþeow Offing, Offa Wærmunding, Wærmund Wyhtlæging, Wihtlæg Wodening.